កម្ពុជាត្រៀមបញ្ជូនគណៈប្រតិភូសង្គមស៊ីវិល ២៥រូប ទៅសិក្សាបទពិសោធន៍អភិវឌ្ឍជនបទនៅប្រទេសចិន
(ភ្នំពេញ)៖ នាថ្ងៃទី២១ ខែឧសភា ឆ្នាំ២០២៦ ឯកឧត្តម ដួង វិរ័ត្ន អនុប្រធាន ប្រចាំការ ក្រុម ប្រឹក្សា ភិបាល វេទិកា សម្ព័ន្ធ សង្គម ស៊ីវិល បានដឹកនាំកិច្ចជំនួបជាមួយបណ្តាសង្គមស៊ីវិលជាដៃគូរបស់វេទិកា សម្ព័ន្ធ សង្គម ស៊ីវិល ដើម្បីពិភាក្សា និងត្រៀមខ្លួនសម្រាប់ការចូលរួមវេទិកាសន្ទនាជាមួយបណ្តាសង្គមស៊ីវិលចិន ស្តីពីការចែករំលែកបទពិសោធន៍នៃការស្តារ និងអភិវឌ្ឍជនបទនៅភូមិភាគស្វយ័តក្វាងស៊ី និង ខេត្តសឺឈួន នៃសាធារណរដ្ឋប្រជាមានិតចិន។
ក្នុងកិច្ចជំនួបនេះ ឯកឧត្តម ដួង វិរ័ត្ន បានលើកឡើងពីសារៈសំខាន់នៃការពង្រឹងកិច្ចសហប្រតិបត្តិការរវាងសង្គមស៊ីវិលកម្ពុជា និងចិន តាមរយៈការផ្លាស់ប្តូរបទពិសោធន៍ជាក់ស្តែងលើការអភិវឌ្ឍជនបទ ការកាត់បន្ថយភាពក្រីក្រ ការលើកកម្ពស់ជីវភាពប្រជាពលរដ្ឋ និងការចូលរួមរបស់សហគមន៍ក្នុងដំណើរការអភិវឌ្ឍ។ ឯកឧត្តមក៏បានជំរុញឱ្យសមាជិកគណៈប្រតិភូត្រៀមមាតិកា និងបទពិសោធន៍ពាក់ព័ន្ធនឹងសកម្មភាពការងារសង្គម និងការអភិវឌ្ឍនៅមូលដ្ឋាន ដើម្បីធ្វើការចែករំលែក និងសិក្សារៀនសូត្រពីគំរូជោគជ័យរបស់ប្រទេសចិន។
កិច្ច ជំនួបពេញមួយព្រឹកតាមរយៈប្រព័ន្ធOnlineនេះ បានជជែកពិភាក្សា យ៉ាងផុលផុស និងប្រមូលបានធាតុចូលពីគ្រប់សមាជិកទាំងអស់ដេីម្បីរាយការណ៍និងស្នេីសុំអនុសាសន៍ណែនាំពីឯកឧត្តម កឹមរ័ត្ន វិសិដ្ឋ ប្រធាន ក្រុម ប្រឹក្សា ភិបាល វេទិកា សម្ព័ន្ធ សង្គម ស៊ីវិល សម្រាប់ផ្តល់ជូនដល់គណៈប្រតិភូមានមូលដ្ឋានពេញលេញក្នុងបេសកកម្មរបស់ខ្លួននាពេលខាងមុខនៅប្រទេសចិន។
គណៈប្រតិភូដែលគ្រោងចូលរួមក្នុងកម្មវិធីនេះ មានសរុបចំនួន២៥រូប ដោយរួមមានថ្នាក់ដឹកនាំវេទិកាសម្ព័ន្ធសង្គមស៊ីវិល តំណាងអង្គការសង្គមស៊ីវិល សមាគម និងស្ថាប័នដៃគូដែលកំពុងអនុវត្តសកម្មភាពពាក់ព័ន្ធនឹងការអភិវឌ្ឍសហគមន៍ អប់រំ សុខាភិបាល បរិស្ថាន និងការអភិវឌ្ឍជនបទនៅកម្ពុជា។
កម្មវិធីវេទិកាសន្ទនានេះមានរយៈពេល២០ថ្ងៃ ចាប់ពីថ្ងៃទី៩ ដល់ថ្ងៃទី២៨ ខែមិថុនា ឆ្នាំ២០២៦ ក្រោមកិច្ចសម្របសម្រួលរបស់វេទិកា សម្ព័ន្ធ សង្គម ស៊ីវិល នៃទីស្តីការគណៈរដ្ឋមន្ត្រី និងការគាំទ្រពី មូលនិធិ ចិន ដើម្បី សន្តិភាព និង ការអភិវឌ្ឍ ។ កម្មវិធីនេះត្រូវបានរំពឹងថា នឹងក្លាយជាវេទិកាដ៏មានសារៈសំខាន់ក្នុងការពង្រឹងទំនាក់ទំនងមិត្តភាព និងកិច្ចសហប្រតិបត្តិការរវាងសង្គមស៊ីវិលកម្ពុជា-ចិន ព្រមទាំងជំរុញការយកបទពិសោធន៍ល្អៗមកអនុវត្តក្នុងការអភិវឌ្ឍសហគមន៍ និងជនបទនៅកម្ពុជាឱ្យកាន់តែមានប្រសិទ្ធភាព និងចីរភាព៕
No comments:
Post a Comment